विद्यार्थीको परामर्शका लागि दुई नेपाली अधिकारी उडिसामा

भारतको उडिसा राज्यको भुवनेश्वरस्थित कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्ययनरत नेपाली छात्राको रहस्यमय मृत्युपछि उत्पन्न तनावका बीच भारतस्थित नेपाली दुतावासले दुई अधिकारीलाई उडिसा पठाएको छ ।
सोमबार सामाजिक सञ्जालमार्फत प्रधानमन्त्री केपी शर्मा ओलीले नयाँ दिल्लीस्थित नेपाली दूतावासले ओडिशामा प्रभावित नेपाली विद्यार्थीहरूलाई परामर्श दिन दुई अधिकारीहरूलाई पठाएको जनाएका हुन् ।
केआईआईटी विश्वविद्यालयको होस्टलमा एक नेपाली छात्रा रुपन्देहीको प्रकृति लम्सालले आत्महत्या गरेको भनिए पनि नेपाली विद्यार्थीहरूले यसलाई रहस्यमय भनेका छन् । लम्सालको मृत्युपछि कलेजमा नेपाली विद्यार्थीले विरोध प्रदर्शन गरेका थिए । कलेज प्रशासनले विरोध प्रदर्शनमा उत्रिएका नेपाली विद्यार्थीलाई होस्टेलबाट निकालेको भारतीय सञ्चारमाध्यमले जनाएका छन् ।
यसैबीच, नेपालस्थित भारतीय दूतावासले केआईआईटीमा अध्ययनरत नेपाली विद्यार्थीहरूको पक्षमा आवश्यक कदम चाल्न तत्पर रहेको जनाएको छ ।
दूतावासले एक विज्ञप्ति जारी गर्दै त्यहाँ अध्ययनरत नेपाली विद्यार्थीहरू दुवै देशबिचको जन सम्बन्धको महत्त्वपूर्ण पक्ष भएको जनाएको छ ।
विज्ञप्तिमा ओडिशाको केआईआईटी कलेजमा अध्ययनरत नेपाली विद्यार्थीको निधनप्रति दुःख व्यक्त गर्दै स्थानीय अधिकारीहरूले यस घटनाको अनुसन्धान सुरु गरिसकेको जानकारी गराएको छ ।
यस्तै केआईआईटीले नेपाली विद्यार्थीहरूलाई क्याम्पस फर्कन, आफ्नो कक्षा पुनः सुरु गर्न र होस्टेलमै बस्न आग्रह गरेको पनि विज्ञप्तिमा उल्लेख छ।