कैलाशका ९९ घरलाई सुधारिएको चुलो वितरण

मकवानपुर/मकवानपुरको कैलाश गाउँपालिकाका ९९ घरपरिवारलाई सुधारिएको चुलो वितरण गरिएको छ । पालिकाको ३, ४ र ७ नम्बर वडामा बसोबास गर्ने ९९ घरधुरीलाई सोमबार सुधारिएको धुँवा रहित चुलो वितरण गरिएको छ ।

गाउँपालिकामा स्वास्थ्य र शिक्षा क्षेत्रमा काम गर्दै आइरहेको सांग्रिला डेभलपमेन्ट एशोसिएसनले तीन वटा वडामा घरधुरी सर्वेक्षण गरेर छनौटमा परेका ९९ घरलाई चुलो प्रदान गरेको हो । चुलो वितरणपछि गाउँपालिकाका अध्यक्ष लोकबहादुर मुक्तानले सुधारिएको चुलो वातावरण र स्वास्थ्यमैत्री रहने बताए । घरमा भएका साना बालबालिका र जेष्ठनागरिक आमाबाहरुको स्वास्थ्यलाई धुँवाले प्रतिकुल असर पारिरहेको अवस्थामा यी चुलोले स्वास्थ्यमा सकारात्मक प्रभाव पार्ने अध्यक्ष मुक्तानले बताए ।

कैलाशका केही स्थानीयले ग्याँस प्रयोग गर्न थाले पनि धेरैजसोले अझै पनि इन्धनको रुपमा दाउरा नै प्रयोग गर्ने गर्दछन् ।

सांग्रिला डेभलपमेन्ट एशोसिएसनका कार्यक्रम संयोजक मधुसदन राउतको अध्यक्षतामा भएको कार्यक्रममा वडा नम्बर ३ का वडाध्यक्ष देवलाल बल, वडा नम्बर ४ का वडा सदस्य नमराज चेपाङ, कटुञ्जे स्वास्थ्य चौकीका प्रमुख आशाकुमारी गुरुङलगायतको आतिथ्यता रहेको थियो । स्वास्थ्य परियोजना अन्तरगत सुधारिएको धुँवा रहित चुलो वितरण गरिएको कार्यक्रम संयोजक राउतले बताए । सुधारिएको चुलो प्रयोगका विषयमा पाँच जना प्राविधिकलाई तालिम दिएर उनीहरुले नै चुलो जडान गर्ने समेत राउतले बताए । गाउँपालिकासँगको समन्वयमा एशोसिएसनले विभिन्न स्वास्थ्य र शिक्षाका क्षेत्रमा कामहरु गर्दै आइरहेको छ ।