सहिद स्मारक प्रिमियर लिग–सिजन १ को अक्सन सम्पन्न

मकवानपुर । वागेश्वरी टोल विकास संस्थाको आयोजनामा आगामी मंसिर २० गतेबाट हेटौँडा ११ मा सञ्चालन हुने सहिद स्मारक प्रिमियर लिगमा सहभागी खेलाडीहरूको अक्सन भएको छ । वागेश्वरी टोल विकास संस्थाका खेल संयोजक सुदिप श्रेष्ठको अध्यक्षतामा हिजो भएको खेलाडी अक्सन कार्यक्रममा गोल्फिन्टार किङ्स, बागथली वारीयर्स, नवलपुर टाइटन्स र थानाभर्याङ म्याव्रिक्स गरी चार वटा क्लबहरूको सहभागिता रहेको थियो ।

प्रत्येक क्लबले अक्सनमा सहभागी भई रु. २५ हजार को सीमाभित्र खर्च गरी मार्की प्लेयरसहित अन्य १४ खेलाडी सोल्ड गरेको आयोजक सदस्य जिके बिष्णुले बताए । यस्तै लिगमा आमन्त्रित सहभागी क्लबको रुपमा रहेको हेटौँडा एकेडेमीले भने अक्सनमा सहभागी नभएको र क्लबसँग ९ जना खेलाडी रहेको र आज अनसोल्ड भएका खेलाडीमध्येबाट वडाबाहिरका ५ जना ग्रेडअनुसार खेलाडी प्रदान गरिने उनले जानकारी दिए । गोल्फिन्टार किङ्सले नविन शर्मा, बागथली वारीयर्सले मन्दिप श्रेष्ठ, नवलपुर टाइटन्सले असिम श्रेष्ठ र थानाभर्याङ म्याव्रिक्सले विपुल खनाल र हेटौँडा एकेडेमीले विकास पटेललाई यसअघि नै मार्की प्लेयरका रुपमा चयन गरिसकेका छन् ।

कार्यक्रममा प्रमुख अतिथिका रुपमा बोल्दै बागेश्वरी टोल विकास संस्थाकी अध्यक्ष उर्मिला आचार्यले आफूहरूले स्थानीय खेलाडीहरूको प्रबद्र्धन गर्न थालेको बताएकी थिईन् ।  अक्सनमा ४२ जना वडाभित्रका खेलाडी र जिल्लाभित्रका तर वडाबाहिरका ४४ जना गरी ८६ खेलाडी अक्सनमा सहभागी रहेका थिए । उनीहरूलाई ए, बी र सी गरी तीन ग्रेडमा विभाजन गरिएको र उनीहरूको अक्सन मूल्य पनि फरक फरक राखिएको छ । सहिद स्मारक प्रिमियर लिग आगामी मंसिर २० गतेबाट मंसिर २७ गतेसम्म हेटौँडा ११ मा रहेको हेटौँडा एकेडेमीको खेल मैदानमा हुनेछ ।