लागूऔषध गाँजा बेच्ने र खरिद गर्ने तीन जना पक्राउ 

गोरखमा अवैध लागूऔषध गाँजा बेच्ने र खरिद गर्ने तीन जनालाई प्रहरीले पक्राउ गरेको छ ।

अजिरकोट-५ का नरबहादुर नेपाली, काभ्रेको दाप्चा नगरपालिका–४ का १९ वर्षीय सागर तामाङ र चितवनको गीतानगर बस्ने २४ वर्षीय गणेश भुजेललाई प्रहरीले अजिरकोट गाउँपालिका-५ रातामाटाबाट पक्राउ गरेको हो । नरबहादुर गाँजा बेच्ने व्यक्ति र तामाङ र भुजेल गाँजा खरिदकर्ता रहेको प्रहरीले जनाएको छ ।  

इलाका प्रहरी कार्यालय जौवारीबाट खटिएको प्रहरी टोलीले चेकजाँचको क्रममा उनीहरुको साथबाट ६ सय ग्राम गाँजा बरामद गरेको जनाएको छ । 

अनुसन्धानको क्रममा उक्त गाँजा नरबहादुरसँग खरिद गरेको खुल्न आएपछि उनलाई पनि नियन्त्रणमा जिल्ला प्रहरी प्रमुख एसपी ओमप्रसाद अधिकारीले जनाएको छ ।

उनीहरुमाथि थप अनुसन्धान भइरहेको प्रहरीले जनाएको छ ।