ढोका फोडेर चोरी गर्दै गरेको अवस्थामा पक्राउ परे २ लुटेरा 

घरको ढोका फोडेर चोरी गर्दै गरेको अवस्थामा २ जना लुटेराहरु पक्राउ परेका छन् । भक्तपुरको मध्यपुर ठिमी नगरपालिका–२ सानोठिमीमा डेरा गरी बस्ने सिन्धुपाल्चोकको साँगागढी घर भएकी २० वर्षीय जुनु श्रेष्ठको कोठामा चोरी गरिरहेको अवस्थामा २ जनालाई पक्राउ गरेको हो । 

महानगरीय प्रहरी बृत्त ठिमीबाट खटिएको प्रहरी टोलीले ताप्लेजुङको चिडिउवा घर भइ काठमाडौं बस्ने पूजन लिम्बु र काभ्रे घर भइ काठमाडौंको डल्लु बस्ने अनिल तामाङलाई पक्राउ गरेको हो । 

उनीहरुले खुकुरी र छिनो लगायतका सामग्री प्रयोग गरी कोठाको ढोका फोरेर लुटपाट गर्न थालेको प्रहरीले जनाएको छ । 

प्रहरीले पक्राउ परेका लिम्बुको साथबाट १ थान छिनो तथा नगद ५ हजार ३ सय १५ रुपैयाँ एवम् तामाङको साथबाट १ थान खुकुरी र नगद १५ हजार ५ सय रुपैयाँ बरामद गरेको छ ।

यससम्बन्धमा थप अनुसन्धान भईरहेको प्रहरीले जनाएको छ ।