रुकुममा विद्यार्थी बोकेको ट्र्याक्टर दुर्घटना, एकको मृत्यु २० घाईते

रुकुममा विद्यार्थी बोकेको ट्र्याक्टर दुर्घटना हुँदा १ जनाको मृत्यु भएको छ भने २० जना घाइते भएका छन् । 

रुकुमको त्रिवेणी गाउँपालिका दलुगैराखोलामा शनिबार बेलुका साढे नौ बजे लु ३ त ९०९५ नम्बरको ट्याक्टर दुर्घटना हुँदा एक विद्यार्थीको ज्यान जानुका साथै अन्य १६ विद्यार्थीसहित २० जना घाइते भएका हुन् । 

 ट्र्याक्टर सडकभन्दा झण्डै २५ मिटर तल खसेको थियो । दुर्घटनाको कारण अझै खुलेको छैन भने चालक गणेश परियार फरार रहेको प्रहरीले बताएको छ ।

गाउँपालिकास्तरीय राष्ट्रपति रनिङ शिल्ड प्रतियोगितामा खेल खेलेर घर फर्किरहेका विद्यार्थीहरु बोकेको ट्याक्टर दुर्घटना भएको प्रहरीले जनाएको छ ।  

दुर्घटनामा ज्यान गुमाउनेमा त्रिवेणी गाउँपालिका वडा नं.५ का १७ वर्षीय छात्र दलबहादुर विक रहेको जनाइएको छ । विक विद्या विकास माविमा कक्षा ८ का छात्र थिए । 

दुर्घटनामा विद्या विकास मावि र अन्धनाशक मावि खुम्चेरीका १६ विद्यार्थी र बाजा बजाउन गएका ४ जना स्थानीय घाइते भएका छन् । घाइतेमध्ये ३ विद्यार्थी र एक जना बाजा बजाउने ९वाद्यवादक० को अवस्था गम्भीर रहेको प्रहरीले जनाएको छ ।