मोरङमा ग्याङ फाईट, तीन जना घाईते, दुईजनाको अवस्था गम्भिर

मोरङको धनपालनथान गाउँपालिका ४ हरकपुरमा ग्याङ फाइट भएको छ ।  शनिबार राती भएको ग्याङफाइट मा तीनजना घाइते भएका छन् । दुईजनाको  अवस्था भने गम्भीर रहेको जनाएको छ ।

४२ वर्षीय विसुनदेव मुखिया, ३० वर्षीय बलराम मुखिया, २४ वर्षीय धनीराम मुखियाको समूह र ३५ वर्षीय मणिचन महतो, ६० वर्षीय रामविलास महतो, ३२ वर्षीय शंकर महतो, २१ वर्षीय हरिओम महतो, २६ वर्षीय किसुन महतोको समूह बीच ग्याङ फाइट भएको हो । 

घटनामा विसुनदेव, बलराम र किसुन घाइते इलाका प्रहरी कार्यालय रंगेलीका प्रहरी निरीक्षक लेखनाथ दाहालले भएको जनाएको छ। घाइतेमध्ये विसुनदेव र बलरामको अवस्था भने गम्भिर रहेको प्रहरीले जनाएको छ । 

चिन्ताजनक अवस्थामा रहेको विसुनदेवको टाउकोको शल्यक्रिया गरिएको र दुवैजनाको विराटनगरको न्युरो अस्पतालमा उपचार भइरहेको प्रहरीले जनाएको छ । गोल्डेन अस्पतालमा उपचाररत किसुनको टाउकोमा सात टाँका लगाइएको भएपनि अवस्था खतरामुक्त रहेको अस्पतालले जानकारी दिएको प्रनि दाहालले बताए । 

प्रहरीका अनुसार कुसहरि मण्डलको होटलमा मादक पदार्थ सेवन गर्ने क्रममा दुई युवाहरु हरिओम र धनीरामबीच विवाद सुरु भएको थियो । 

शरीरका विभिन्न भागमा सामान्य चोटहरु मात्र रहेको धनीराम, मणिचन, रामविलास, शंकर, हरिओमलाई पक्राउ गरेर घटनाको अनुसन्धान सुरु गरिएको जनाएको छ ।