बिरामी बोकेको जीप दुर्घटना, एकको मृत्यु, तीन जना गम्भिर घाईते

आज सोमबार बिहान सवारी दुर्घटना हुँदा एकको मृत्यु भएको छ भने तीन जना गम्भीर घाइते भएका छन् । ओखलढुंगाको चम्पादेवी गाउँपालिका–५ को सिद्धडाँडामा जीप दुर्घटना हुँदा सोही ठाउँका ५५ वर्षीय सन्तोष विश्वकर्माको घटनास्थलमै मृत्यु भएको हो ।

गाउँबाट बिरामी लिएर ओखलढुङ्गा सदरमुकामस्थित मिसन अस्पताल आउँदै गरेको बा २१ च ७३६१ नम्बरको जीप दुर्घटनामा हुँदा बिरामी विश्वकर्माको घटनास्थलमै मृत्यु भएको हो ।  

चालक सोही ठाउँका जीतबहादुर बस्नेत, मृतक विश्वकर्माकी छोरी कल्पना र स्थानीय अमिता बुढाथोकी दुर्घटनामा हुँदा गम्भीर घाइते भएका छन् ।

घाइतेको अवस्था गम्भीर रहेकाले स्थानीयको सहयोगमा प्रहरीले उद्धार गरेर अस्पताल लैजाने तयारी गरेको जिल्ला प्रहरी कार्यालय, ओखलढुंगाले जनाएको छ ।