परोपकारका नाममा व्यापार गर्ने संस्थालाई कारबाही गर्न माहिला तथा सामाजिक समितीको गृहलाई निर्देशन

परोपकारका नाममा व्यापार गर्ने संस्थाको पहिचान गरी कारबाही गर्न प्रतिनिधिसभाको महिला तथा सामाजिक समितिले गृह मन्त्रालयलाई निर्देशन दिएको छ ।

आज सोमबार बसेको समिति बैठकले त्यस्ता संस्थाहरुको अनुगमन र पहिचान गरी तत्काल कारबाही गर्न गृह मन्त्रालय, महिला, बालबालिका तथा ज्येष्ठ नागरिक मन्त्रालय र समाज कल्याण परिषद्लाई निर्देशन दिएको हो ।

 बालबालिकाको हकहितका लागि खुलेका गैरसरकारी संस्थाको कार्यशैलीमा पारदर्शीता कायम गर्न, पोषणको अवस्था सुधार गर्न, कुनै पनि कारणबाट बालअधिकार खण्डित हुन नदिन समितिले निर्देैशन समेत दिएको छ । समितीले मर्यादित व्यवहार गराउन सूचनाको हकसम्बन्धी ऐन २०६४ अनुसार हरेक तीन महिनामा अध्यावधिक विवरण अनिवार्य रुपमा प्रकाशन गराउने व्यवस्था मिलाउन पनि समितिले मन्त्रालयलाई निर्देशन दिएको छ ।

समितिले संघीय संरचनाअनुसार बन्ने सम्पूर्ण बाल संरक्षणसम्बन्धी संस्थाहरुलाई बालबालिकामैत्री बनाउने, न्यूनतम मापदण्ड पूरा गरेर मात्र खोल्ने, स्वास्थ शिक्षालगायतका न्यूनतम आधारभूत आवश्यकता पूरा गराउन पनि मन्त्रालयलाई निर्देशन दिएको छ ।