मोटरसाइकल सहित १० लाख नगद बरामद

रौतहट प्रहरीले १० लाख १० हजार रूपैयाँ सहित मोटरसाइकल बरामद गरेको छ । प्रहरीको गस्ती टोलीले रौतहटको इशनाथ नगरपालिका परोहा डुमरियाबाट सो रकम सहित मोटरसाइकल बरामद गरेको हो । 

प्रहरीको टोलीले बिहीबार बिहान गस्ती गर्दै गर्दा ना ५४ प २११६ नम्बरको मोटरसाइकलसहित सो रकम बरामद गरेको हो । मोटरसाइकल चालक भने प्रहरीलाई देख्ने वित्तिकै नजिकैको नहरमा झोला र मोटरसाइकल छोडेर भागेका छन् । 

प्रहरीले झोला खोलेर चेकजाँच गर्ने क्रममा नेपाली १० लाख १० हजार नगद फेला परेको  प्रहरी चौकी औरैयाले जनाएको छ ।

प्रहरी चौकी औरैयाका प्रहरी सहायक निरिक्षक ललित कुमार साहले रकम ल्याउने युवकको खोजि कार्य जारी रहेको बताए । उनले सो नगद कुन प्रयोजनको लागि ल्याइएको भन्ने बारेपनि अनुसन्धान भइरहेको बताए । 

जिल्ला प्रहरी कार्यालय रौतहटका प्रमुख एसपी रबीराज खड्काले उक्त रकम र मोटरसाइकल तस्करको हुन सक्ने जनाएका छन् । 

लकडाउनको समयमा लुकीछिपी भारतीय सामान खरिद गर्न जाने क्रममा प्रहरीलाई देखेर तस्कर समूह भागेको हुनसक्ने अनुमान रहेको एसपी खड्काले जानकारी दिएका छन् ।

बरामद गरिएको नगद  र मोटरसाइकल थप अनुसन्धानको लागि जिल्ला प्रहरी कार्यालय पठाइएको प्रहरीले जनाएको छ ।

यो समाचार रौतहटका संचारकर्मी अनमोल कार्कीको सहयोगमा तयार पारिएको हो ।