मकवानपुर प्रहरीद्वारा २ जना पक्राऊ

जिल्ला प्रहरी कार्यालय मकवानपुरले लागूऔषध ओसारपसारमा संलग्नलाई हेटौँडा बसपार्कबाट पक्राऊ गरी सार्वजनिक गरेको छ । प्रहरीले लागूऔषध चरेश ८ किलो १ सय ६० ग्रामसहित पर्सा पटेर्वा सुगौली नगरपालिका वडा नं. १ बस्ने २४ वर्षीया गीता राईलाई पक्राऊ गरेको हो । मकवानपुर प्रहरीबाट प्रहरी निरीक्षक पवनकुमार झाको कमाण्डमा खटिएको प्रहरी टोलिले आज बिहान करीब ३ बजे सो लागूऔषध चरेशसहित पक्राउ गरेको आज हेटौंडामा गरिएको पत्रकार सम्मेलनमा जानकारी दिएको छ ।
काठमाण्डौ तर्फबाट धरानतर्फ जाँदै गरेको बा ४ ख ८०६० नं. को यात्रुवाहक बसलाई रोकी चेकजाँच गर्ने क्रममा झोलामा लुकाई छिपाई ल्याएको उक्त चरेश फेला परेपछि पक्राउ गरिएको जिल्ला प्रहरी कार्यालय मकवानपुरले जनाएको छ । पक्राऊ गरेका उपर थप आवश्यक अनुसन्धान भइरहेको प्रहरीले जनाएको छ ।
त्यस्तै, गत आश्विन ७ गते भक्तपुर ठिमीबाट हराएको मोटरसाईकलसहित एक जनालाई पक्राउ गरी सार्वजनिक गरेको छ । ठिमीमा पार्किङ्ग गरीराखेको लु. ५४ प ६०९८ नम्बरको सो मोटरसाईकललाई चोरी गरी मकवानपुर तर्फ आउँदै गरेको अवस्थामा भीमफेदी वडा नम्बर १ बाट प्रहरीले पक्राऊ गरेको थियो । पक्राऊ पर्नेमा चन्द्रनगर नगरपालिका वडा नम्बर ८ का अविनाश चौधरी रहेको जिल्ला प्रहरी कार्यालय मकवानपुरले जनाएको छ ।