कृषि विकास बैंकको झन्डै पाँच करोड रूपैयाँ लुट्ने नेपाल पक्राउ

कृषि विकास बैंकको झन्डै पाँच करोड रूपैयाँ लुट्ने गिरोहका एक सदस्य काठमाडौंमा पक्राउ परेका छन् । पक्राउ पर्नेमा मोरङ रंगेली नगरपालिका-२ का ४३ वर्षीय दीपक नेपाल रहेका छन् ।

उनी कृषि विकास बैंकको गोल्फुटार शाखामा पैसा झिक्न गएका  नेपाललाई महानगरीय अपराध महाशाखाले शुक्रबार काठमाडौंबाटै  पक्राउ गरेको हो।

उनले ९ लाख रुपैयाँको चेक साट्न लागिरहेका बेला पक्राउ गरिएको र लुटिएको ४ करोड ७६ लाख रूपैयाँमध्ये नेपालको खातामा एक करोड मौज्दात रहेको महाशाखा प्रमुख एसएसपी सहकुल थापाले जनाएको छ ।

नेपाल सिस्टम ह्याक गर्ने समूहका एजेन्ट रहेको खुलेको छ। यसअघि उनीजस्तै १८ जना एजेन्टहरू पक्राउ परेका थिए। 

गत असोज ५ गते सिरहा शाखाको उक्त पैसा सिस्टम ह्याक गरेर बैंकको केन्द्रीय कार्यालय पुर्‍याइएको थियो।

पछि उक्त रकम बैंकबाट विभिन्न व्यक्तिले निकालेका थिए। यसका मुख्य योजनाकार अफ्रिकन मूलका नागरिक पिटर रहेको प्रहरीले बताउँदै आएको छ।

मुम्बईमा बसेर उनले कृषि विकास बैंकको सिस्टम ह्याक गरी रकम विभिन्न व्यक्तिको खातामा पुर्‍याएर निकालेको प्रहरीले जनाएको छ । 

कृषि विकास बैंकको सिस्टम ह्याक गरेर रकम झिकेको प्रकणमा ३६ जना प्रतिवादी छन्।  

पक्राउ परेका नेपाललाई आवश्यक कारबाहीको लागि महानगरीय प्रहरी परिसरको जिम्मा लगाइएको महाशाखाले जनाएको छ ।