मनहरी देशकै पहिलो बालमैत्री गाउँपालिका घोषित

मनहरी गाउँपालिका देशकै पहिलो बालमैत्री गाउँपालिका घोषणा भएको छ । आज मकवानपुको मनहरीगाएँपालिकाले बालमैत्री स्थानीय शासन पद्धति अवलम्बन गर्दै बालमैत्री गाउँपालिका घोषणा भएको हो ।

देशभरका ४ सय ६० गाउँपालिका मध्य मकवानपुरको मनहरी गाउँपालिकालाई देशकै पहिलो बालमैत्री गाउँपालिका घोषणा गरेएका हो ।

नेपाल सरकारका उपप्रधान तथा रक्षामन्त्री इश्वर पोखरेलले घोषणा पत्र पढेर मनहरीलाई बालमैत्री गाउँपालिका घोषण गरेका हुन् । मन्त्री पोखरेलले गाउँपालिकालाई बालमैत्री गाउँपालिका घोषणा गरेर मात्र नपुग्ने भन्दै यो अभियानलाई निरन्तरता दिनुपर्ने बताएका छन् ।

बालमैत्री घोषणाका लागि मनहरी गाउँपालिकामा करिब डेढवर्ष देखि आधारभूत रुपमा बालश्रम र बाल विवाहका घटनालाई कडाईका साथ बन्देज गरीएको छ । बालमैत्री गाउँपालिका घोषणाका लागि गाउँपालिकाले योजना तर्जुमा गर्ने, तालिम, गोष्ठी, अन्तरक्रियाहरु सञ्चालन गर्ने, बाल विवाहहरु रोक्ने, बाल श्रम न्यूनिकरण गर्ने कामलाई निरन्तरता दिदै आएको थियो ।

मनहरी गाउँपालिकाले भौतिक पूर्वाधारहरुको निर्माण र पुननिर्माण बालमैत्री ढंगले गरिएको बताएको छ । मनहरी गाउँपालिकाले बालमैत्री गाउँपालिका घोषणाका लागि बाल अधिकार समिति, गाउँ बाल सञ्जाल, बालमैत्री स्वयम्सवकहरु, बालमैत्री शासन समितिलाई सक्रिय बनाएर काम गर्दै आएको छ ।

पछिल्लो तथ्यांक अनुसार मनहरी गाउँपालिकामा ८ हजार ६ सय ५५ घरधुरीको कुल ४६ हजार ८५३ जना जनसंख्या रहेको छ । तीमध्ये ८ हजार १ सय १६ जना बालक र ७ हजार ६ सय २३ जना बालिका रहेका छन् ।

कूल ८ हजार ६ सय ५५ घरधुुरीमध्ये स्वच्छ पिउने पानी व्यवस्था सबैमा रहेको गाउँपालिकाले जनाएको छ । साबुन पानीले हात धुने व्यवस्था ८ हजार १ सय २६ घरधुरीमा रहेको सर्वेक्षणले देखाएको गाउँपालिकाको तथ्यांकमा छ । गाउँपालिकाभित्र ८ हजार ६२ घरमा शौचालय रहेको पाइएको छ ।

गाउँपालिकाले निकृष्ट बालश्रममा आश्रित बालबालिकाहरुलाई विद्यालय फिर्ता गराएको छ । गाउँपालिकामा आर्थिक बर्ष २०७५÷७६ मा ९ सय ५ जना गर्भवती महिला रहेकामा तीमध्ये ४ पटक गर्भजाँच गराउनेको संख्या ८ सय ५८ जना र २ सय २५ वटा आइरन चक्की खानेको संख्या ८ सय १५ रहेको गाउँपालिकाले जनाएको छ । तीमध्ये दक्ष जनशक्तिबाट सुत्केरी गराउनेको संख्या ८ सय १५ जना रहेको थियो ।

मनहरी गाउँपालिका अध्यक्ष एकराज उप्रेतीको अध्यक्षतामा भएको घोषणा कार्यक्रममा बागमती प्रदेशका मुख्यमन्त्री डोरमणि पौडेल, अर्थ समितिका सभापति तथा प्रतिनिधिसभा सदस्य कृष्ण प्रसाद दहाल, प्रतिनिधि सभा सांसद विरोध खतिवडा, राष्ट्रियसभा सदस्य रामचन्द्र राई, प्रदेशसभा सदस्य तथा नेकपा मकवानपुरकी अध्यक्ष मुनु सिग्देल लगायतकाको आतिथ्यता रहेको थियो ।