कोरोनाको त्रासः कम सजाय तोकिएका कैदीहरुलाई पैसा तिराएर छाडिँदै

विश्वभर फैलिरहेको कोरोना भाईरस (कोभिड–१९)को नियन्त्रणका लागि सरकारले आजदेखि थुनुवा छाड्न थालेको छ । आज सोमबार पहिलो चरणमा देशभरका जिल्ला प्रशासन कार्यालयले अभद्र व्यवहार मुद्दामा कारागारमा रहेकाहरुलाई छाडेको छ । 

आज डिल्लीबजार कारागारबाट १५ जना छुटेका छन् । जिल्ला प्रशासन कार्यालय ललितपुरले नख्खु कारागारबाट ५ जना छोडेको छ । यही मुद्दाका अरु ६ जनालाई पनि छाड्न प्रशासनले प्रक्रिया अगाडि बढाएको छ ।

सर्वोच्च अदालतको आदेशपछि थुनुवा छाड्ने प्रक्रिया अगाडि बढाइएको काठमाडौंका प्रमुख जिल्ला अधिकारी जनकराज दाहालले बताएका छन् । अभद्र व्यवहारमा जिल्ला प्रशासन कार्यालयले नै निर्णय गर्न सक्छ ।  अघिल्लो महिनाको तथ्यांक अनुसार देशभर अभद्र व्यवहार मुद्दामा करिब डेढ सय जना थुनामा छन्।

यस्तै जिल्ला अदालतहरुले पनि एक वर्षभन्दा कम सजाय तोकिएका र सुधारगृहमा रहेका बालबालिकाहरुलाई छाड्ने प्रक्रिया सुरु गरेको छ । बालबालिकालाई अविभावकको जिम्मा लगाउने तयारी गरिएको र अन्य कैदीलाई दैनिक तीन सय रुपैयाँका दरले कैदवापत तिराएर छाड्न लागिएको हो । कारागार कार्यालय धादिङमा रहेका ९ जना कैदीलाई दैनिक ३ सय रुपैयाँ लिएर छाडिएको छ।

यस्तो व्यवस्था कानुनमा भएपनि यसबीचमा कार्यन्वयनमा थिएन। तर सर्वोच्चको पूर्ण इजलासले यो निर्णय कार्यन्वयन गर्न आदेश दिएको हो।