टिपर र ट्रयाक्टर ठोकिँदा एकको मृत्यु, एक घाइते
हेटौडा न्युज
मकवानपुर । सर्लाहीमा टिपर दुर्घटना हुँदा एक जनाको मृत्यु भएको छ भने एक घाइते भएका छन् । सर्लाहीको ईश्वरपुरमा भएको दुर्घटनामा सहचालक सुजन दनुवारको मृत्यु भएको छ भने चालक विष्णुबहादुर दनुवार गम्भीर घाइते भएका छन् ।
मंगलबार राति ईश्वरपुर नगरपालिका–५ फुलजोरस्थित भित्रि सडक खण्डमा टिपर र ट्रयाक्टर आपसमा ठोकिँदा टिपरका सहचालक उदयपुको कटारी नगरपालिका–७ का २३ वर्षीय दनुवारको मुत्यु भएको हो ।
फलजोरबाट बयलवासतर्फ जाँदै गरेको ना ८ ख ३० ९३ नम्बरको टिपर र विपरित दिशाबाट आउँदै गरेको ना ४ त ४१२५ नम्बरको ट्रयाक्टर आपसमा ठोक्किएर दुर्घटना भएको प्रहरीले जनाएको छ ।
दुर्घटनामा गम्भीर घाइते भएका सहचालक दनुवार उपचारका लागि बिरगंज लैजाँदै गर्दा बाटोमै मृत्यु भएको प्रहरीले जनाएको छ ।
टिपर चालक कटारी नगरपालिका–६ निवासी २४ वर्षीय दनुवारको उपचारको लागि बिरगंज लगिएको छ ।
ट्रयाक्टर चालक सर्लाहीको ईश्वरपुर नगरपालिका–६ का रामप्रसाद महरालाई प्रहरीले नियन्त्रणमा लिएको जिल्ला प्रहरीका प्रवक्ता एवं प्रहरी नायव उपरिक्षक मदन कुवँरले जानकारी दिए ।
यो पनि पढ्नुहोस्
