तातोपानी नाकाबाट आयात–निर्यात ठप्प

चौतारा । बाढी पहिरोले अरनिको राजमार्गको बाह्रबिसे– तातोपानी सडक अवरुद्ध भएपछि आयात–निर्यात ठप्प भएको छ । सडक अवरुद्ध भएसँगै तातोपानी भन्सार यार्डमा रहेका मालबाहाक कन्टेनर रोकिएका छन् ।

व्यापारिक तथा औषधिजन्य सामग्रीका १५–२० वटा मालबाहक कन्टेनर लामो समयदेखि सुख्खा बन्दरगाहमै रोकिएको भन्सार कार्यालयले जनाएको छ । कोभिड – १९ सङ्क्रमण रोकथामको लागि चीनको न्यालम जिल्लाले छिमेकी जिल्ला सिन्धुपाल्चोकलाई सहयोगस्वरुप हस्तान्तरण गरिएका औषधिजन्य सामग्री भन्सारमै रोकिएका छन् ।

गत असार २४ गतेको बाढीपहिरोले बाह्रबिसेदेखि तातोपानी को २६ किलोमिटर खण्डमा पर्ने दर्जैनौं ठाउँमा क्षति पुर्‍याएको थियो ।

बाढी पहिरो बन्द भएको उक्त सडक मर्मतपछि यही साउन १८ गतेदेखि सञ्चालनमा आए पनि पुनः अवरुद्ध भएको छ ।