मरेका हात्तीमा क्षयरोग देखिएपछि जिउँदोको परीक्षण सुरु

चितवन । चितवन राष्ट्रिय निकुञ्जका मरेका हात्तीमा क्षयरोगको जीवाणु देखिएपछि जिउँदो हात्तीको पनि परीक्षण सुरु भएको छ ।

सौरहाका हात्तीमा क्षयरोग परीक्षणका लागि नमुना सङ्कलनको काम साेमबारदेखि सुरु गरेको निकुञ्जका वरिष्ठ पशु चिकित्सक विजय श्रेष्ठले बताउनुभयो ।

हात्तीको नमुना सङ्कलन गर्न चारदेखि पाँच दिन लाग्ने निकुञ्जले जनाएको छ । निकुञ्जमा अहिले ५९  हात्ती रहेका छन् । सन् २००२ यता क्षयरोगका कारण निकुञ्जका १५ वटा हात्ती मरेका छन्  । यो अवधिमा अन्य कारणसहित २५ हात्ती मरेको तथ्याङ्क छ ।

हात्तीमा पहिलो पटक सन् २००२ मा क्षयरोग देखिएको थियो । त्यतिबेलाको सङ्क्रमण सन् २०१६ सम्म जारी नै रह्यो । त्यतिबेला निकुञ्जका १७, निजी ४१ र राष्ट्रिय प्रकृति संरक्षण कोषका दुई हात्तीमा क्षयरोग देखिएको थियो ।

त्यसपछिका केही वर्ष सङ्क्रमण नदेखिए पनि सन् २०१८ यता क्षयरोगका कारण चार हात्ती मरेको अनुमान छ । गएको साउन १९ गते मरेको दीपेन्द्रगजमा क्षयरोगको सङ्क्रमण पुष्टि भएको थियो । यसअघि मरेका तीन हात्तीको पोस्टमार्टमका क्रममा फोक्सोमा समस्या देखिएकाले क्षयरोगको सङ्क्रमण भएको अनुमान गरिएको थियो ।

निकुञ्जका प्रमुख संरक्षण अधिकृत अणनाथ बरालले क्षयरोग परीक्षणको काम तत्काल सुरु गर्न लागिएको जानकारी दिनुभयो । क्षयरोग देखिएमा उपचार गरेर हात्तीलाई निको पार्न सकिने भएकाले सबै हात्तीको परीक्षण गरिने उहाँको भनाइ छ ।

निकुञ्जका हात्ती विभिन्न पोस्टमा सुरक्षाका लागि राखिएका छन् भने निजी हात्ती पर्यटक बोक्नका लागि होटलले प्रयोग गर्दै आएका छन् ।  निकुञ्ज हात्ती सफारीका लागि अन्तर्राष्ट्रिय रुपमा प्रख्यात छ ।

यहाँ सामुदायिक वनमा निजी हात्तीमा पर्यटकलाई घुमाउने गरिन्छ । हात्ती चढेर दुर्लभ वन्यजन्तु हेर्न पर्यटक रुचाउँछन् । हात्तीमा क्षयरोग देखिएमा उपचार गर्न लामो समय लाग्ने र खर्चिलो हुने चिकित्सक बताउँछन् । रासस