बागलुङको ढोरपाटनमा पहिरोः ४ को मृत्यु, १३ जना बेपत्ता

बागलुङ । बागलुङको ढोरपाटन नगरपालिका–९ र आसपास क्षेत्रमा आएको बाढीपहिरोमा परी चार जनाको मृत्यु भएको छ भने १३ जना बेपत्ता भएका छन् ।

बुधबार राति देउराली र सुपुरदुङ क्षेत्रमा खसेको पहिरोमा यहाँका १५ वटाभन्दा बढी घर पुरिएका छन् ।

बेपत्ता हुनेमा ढोरपाटन नगरपालिका–९ का ३५ वर्षीया कौशिला पुन , उनका छोरा ६ वर्षीय हिक्मत, सोही ठाउँ बस्ने ३५ वर्षीय जीतबहादुर घर्ती, ४० वर्षीय राजु घर्ती, ३० वर्षीया कुमारी विक, १९ वर्षीया पुतली विक, ३२ वर्षीया करमती घर्तीमगर, ३५ वर्षीया रीना घर्तीमगर, ३५ वर्षीया दिलमाया घर्तीमगर र उनका ६ वर्षीय छोरा, ५५ वर्षीया डोटी पुन, ५२ वर्षीया टुलमती पुन र गलकोट नगरपालिका ४ घर भई ढोरपाटन घुम्न गएका २५ वर्षीय नवीन भण्डारी छन् ।

नेपाल प्रहरी, नेपाली सेनासमेतको टोलीले बेपत्ता भएकोहरुको खोजी कार्य भइरहेको जनाएको छ ।

उक्त स्थानमा दुई दर्जन घर जोखिममा छन् ।