मनहरीमा ईनारभित्र पसेका दुई जना हराए, एक अचेत

मकवानपुर । मकवानपुरको मनहरीमा ईनारमा पसेका २ जना बेपत्ता भएका छन् भने अर्का एक जना अचेत अवस्थामा फेला परेका छन् ।
मनहरी–७ स्थित साह पार्टी प्यालेसको ईनारभित्र राखेको पानी तान्ने मोटरपम्प मर्मत गर्न गएका दुई जना ईनार भित्रै हराएका हुन् । त्यस्तै स्थानीय आनन्द लो अचेत अवस्थामा फेला परेका हुन् ।

पार्टी प्यालेस संचालकका छोरा सुरज साह मोटरपम्प बनाउन इनारमा पसेको र बाहिर नआएपछि स्थानीय उत्सव नेपाली पनि इनारमा पसेका थिए । दुबै जना बाहिर नआएपछि उद्धारका लागि डोरीको सहायताले इनार भित्र पसेका लो अचेत अवस्थामा भेटिएका हुन् ।

उनको उद्धार गरि उपचारका लागि हेटौंडा पठाइएको ईलाका प्रहरी कार्यालय मनहरीले जनाएको छ । हराएका दुई जनाको खोजी कार्य भइरहेको प्रहरीले जनाएको छ ।