माओवादीको राष्ट्रिय सम्मेलनमा करिब १ हजार ५ सय प्रतिनिधि सहभागी हुने

मकवानपुर । नेकपा (माओवादी केन्द्र) को राष्ट्रिय सम्मेलनमा करिब १ हजार ५ सय प्रतिनिधि सहभागी हुने भएका छन् ।

आगामी पुस ११–१३ गतेसम्म सम्मेलन गर्न गइरहेको माओवादी केन्द्रले प्रत्येक प्रदेशबाट ३० जनाको दरले प्रतिनिधि छनौट गर्नेछ । त्यस्तै १ हजार ५सय संगठित सदस्य बराबर १ जना प्रतिनिधि चयन हुने छन् । माओवादी अध्यक्ष पुष्पकमल दाहाल ‘प्रचण्ड’ले जारी गरेको आन्तरिक परिपत्रअनुसार प्रत्येक प्रदेशले कम्तीमा १ जना घाइते र अपांगता भएकालाई प्रतिनिधि चयन गर्नुपर्ने छ । केन्द्रीय सदस्यहरू स्वतः सम्मेलनका प्रतिनिधि हुने छन् ।

प्रत्येक केन्द्रीय विभागबाट ३÷३ जना प्रतिनिधि छानिने छन् । त्यस्तै केन्द्रीय कार्यालयबाट ५ प्रतिशत प्रतिनिधि मनोनीत हुने छन् । माओवादीले राष्ट्रिय सम्मेलनमा सहभागी हुने आयोजक एवम् प्रतिनिधिहरूलाई प्रतिनिधि शुल्क २ हजार तोकेको छ । सबै प्रतिनिधिहरुले खाने, बस्नेलगायतका खर्चको व्यवस्थापन आफैं गर्नु पर्नेछ ।

प्रतिनिधिहरूको सबै व्यवस्थापनको जिम्मा सम्बन्धित प्रदेशको हुने परिपत्रमा उल्लेख छ । राष्ट्रिय सम्मेलनका लागि माओवादीले वडा र पालिका सम्मेलन गरिसकेको छ । भने मंसिर २५ गते प्रदेश सम्मेलन गर्दैछ ।