सांसद अपहरणको जाहेरी दिन जसपाका नेता सरकारी वकिल कार्यालयमा

सांसद अपहरणको जाहेरी दिन जनता समाजवादी पार्टीका नेताहरु जिल्ला सरकारी वकिलको कार्यालयमा पुगेका छन् । सांसद डा. सुरेन्द्र यादवलाई अपहरण गरेको भन्दै दिइएको जाहेरी महानगरीय प्रहरी परिसर टेकुले दर्ता गर्न नमानेपछि जनता समाजवादी पार्टीका नेताहरु उजुरी लिएर जिल्ला सरकारी वकिलको कार्यालय काठमाडौँ, बबरमहल पुगेका हुन् । 

सांसद यादवलाई नेकपाका सांसदहरु महेश बस्नेत, किसन श्रेष्ठ र प्रहरीका पूर्वआईजीपी सर्वेन्द्र खनालले अपहरण गरेको जसपाको आरोप छ ।

यादवसहित पार्टीका शीर्ष नेताहरु आइतबार जाहेरी लिएर प्रहरी परिसर टेकु पुगे पनि प्रहरीले जाहेरी लिन मानको थिएन । सरकारी वकिलको कार्यालयमा राजेन्द्र महतो, उपेन्द्र यादव, अशोक राईलगायतका नेताहरु उपस्थित छन् ।

सांसद यादवलाई पार्टी विभाजनका लागि प्रधानमन्त्री केपी शर्मा ओलीको निर्देशनमा नेकपाका सांसदहरु महेश बस्नेत, किसान श्रेष्ठ र पूर्वमहानिरिक्षक सर्वेन्द्र खनालले जनकपुरबाट काठमाडौँसम्म ल्याएका थिए। उक्त प्रकरणलाई समाजवादीले अपहरण भएको भन्दै छानबिन गरेर दोषीमाथि कारबाही हुनुपर्ने बताउँदै आएका छन्।