भरतपुर कोरोना अस्पतालमा चोरी भएको विषयमा अनुसन्धान थालियो

भरतपुर कोरोना अस्पतालमा चोरी भएको विषयलाई लिएर जिल्ला प्रशासन कार्यालय र जिल्ला प्रहरी कार्यालय चितवनले अनुसन्धान शुरू गरेका छन्।

प्रमुख जिल्ला अधिकारी नारायणप्रसाद भट्टराईका अनुसार आन्तरिकरूपमा कर्मचारी परिचालन गरी अनुसन्धानको कामलाई अघि बढाइएको छ। टोलीले अनुसन्धानको काम शुरू गरिसकेको र केही दिनमा नतिजा आउने उनले बताए। उनले भने, “अनुसन्धानको काम भइरहेको छ, यो सकिएलगत्तै कमजोरी पाइएमा कानूनी प्रक्रिया अगाडि बढ्छ।”

केही समयअघि मात्रै भरतपुर महानगरपालिका-१० मा स्थापना गरिएको कोरोना विशेष (अस्थायी) अस्पतालको सामान कर्मचारीले पोको पार्दै गरेको भिडिओ सार्वजनिक भएको थियो।

त्यसलगत्तै अख्तियार दुरुपयोग अनुसन्धान आयोगले कोरोना अस्पतालका आवश्यक कागजपत्र नियन्त्रणमा लिएको थियो। कर्मचारीले ती सामग्री भरतपुर महानगरपालिकाले लगेको जनाउँदै आएका छन्। तर, रातको समयमा पोको पारेर बाहिर लगिएपछि उनीहरूको नियतमाथि प्रश्न उठाउँदै छानबिनको माग गरिँदै आइएको छ।
      
नेपाली कांग्रेस चितवनले अस्पतालमा भएको अनियमितता र चोरीको विषयमा कारबाही गर्न माग गर्दै आन्दोलन गरिरहेको छ। भरतपुर महानगरपालिकाको अगुवाइमा कोरोना आशंका भएका बिरामीलाई उपचारका लागि ७ चैतमा सो अस्पताल स्थापना गरिएको थियो।

रासस