नेपालमा ७ जना कोरोना संक्रमित थपिए,  संक्रमितको संख्या १ सय ९ पुग्यो

नेपालमा थप ७ जनामा कोरोना भाइरस संक्रमित फेला परेका छन् ।  यससँगै नेपालमा कोरोना संक्रमितको संख्या १ सय ९ पुगेको छ ।

स्वास्थ्य तथा जनसंख्या मन्त्रालयका अनुसार उदयपुर र कपिलवस्तुका ३/३ तथा पर्साका एक जनालाई संक्रमण भएको छ। उदयपुरको भुल्केका संक्रमित तीन जना नै महिला छन्। त्यहाँ १८, ४५ र ६५ वर्षीया महिलालाई संक्रमण भएको छ।

कपिलवस्तुका भने तीन जना नै पुरुष छन्। उनीहरु दुई जना १८ र एक जना १७ वर्षका हुन्। उता पर्सा छपकैयाका भने ६२ वर्षीय पुरुषलाई संक्रमण भएको छ।

राष्ट्रिय जनस्वास्थ्य प्रयोगशाला काठमाडौँ र कोशी अस्पताल विराटनगरका प्रयोगशालामा गरिएको परीक्षणमा उनीहरु संक्रमित भएको पत्ता लागेको हो। उनीहरु सबै जनाको स्वास्थ्यअवस्था सामान्य रहेको स्वास्थ्य तथा जनसंख्या मन्त्रालयको विज्ञप्तिमा उल्लेख छ।