प्रेस लेखेको मोटरसाइकल र पेस्तोलसहित दुई जना पक्राउ

प्रेस लेखेको मोटरसाइकलमा सवार दुई जनालाई  प्रहरीले हतियारसहित पक्राउ गरेको छ ।

सर्लाहीको विष्णु गाउँपालिका–३, विश्वनाथ टोलबाट स्थानीय २५ वर्षीय मदन साह कानु र भारतको सितामढी बस्ने १९ वर्षीय अनिष साहलाई पक्राउ गरिएको हो । 

उनीहरूको साथबाट दुई थान पेस्तोल, ६ राउण्ड गोली र एकथान म्यागजिन बरामद् गरिएको प्रहरीले जनाएको छ ।

प्रेस लेखेको बीआर ३० एम ६७८७ नम्बरको मोटरसाइकलसहित अपरिचित व्यक्तिहरू लुकीछिपी बसेको भन्ने खबर पाएपछि प्रहरीले उनीहरूलाई पक्राउ गरेको हो ।

उनीहरूलाई हिरासतमा राखेर अनुसन्धान भइरहेको प्रहरीले जनाएको छ।