कोरोनाको कहरः स्विडेनबासीले भने “जो बाँच्छ उसैले देख्नेछ ”

बल्लबल्ल सकिएको जाडोपछि लागेको न्यानो घाम ताप्न सधैँझैँ स्टकहोमको सबैभन्दा ठूलो स्क्वायरमा यतिखेर मान्छेहरुको भीड छ । त्यहाँ न कसैलाई लकडाउनको पर्वाह छ न कोरोनाको चिन्ता । मानिसहरू फूल पसलमा डुलिरहेका देखिन्छन् भने बालबालिका साइकल चलाइरहेका छन्, दर्जनौँ मानिस बेन्चमा बसेर घाम तापिरहेका छन् भने कति बाहिर आउट डोर रेस्टुरेन्टमा बसेर खाइरहेका छन् ।

जहाँ बाँकी विश्व कोभिड–१९ का कारण लकडाउनमा घरभित्र थुनिएर बसेको छ त्यहीँ स्वीडेन बासीहरूका लागि भने, दिनहरू सधैँ जसरी सामान्य चलिरहेका छन् । 

त्यसरी नै आफ्ना साथीहरूको समूहमा बसेर बियर पिउँदै गरेकी ग्रोसरी स्टोरमा काम गर्ने २८ वर्षीया सेन्ड्रा बर्कभिस्ट भन्छिन्, “के बाहिर साँच्चै त्यति भयानक अवस्था छ ? ” उनले फेरि भनिन्, “अवश्य पनि हामी संवेदनशील मानिसहरूका लागि चिन्तित छौँ तर मिडिया नहुने हो भने हामीलाई दुनियाँमा त्यस्तोसम्म भइरहेको छ भन्ने कतै कहीँ आभास हुँदैन ।” 

यसरी युवाहरू मात्र नभएर उच्च जोखिमको समूहमा पर्ने नागरिकहरू समेत त्यति धेरै चिन्तित छैनन् । जस्तै ८० वर्षीया कोरनर र ६७ वर्षीया एरिक्सन पनि त्यही मान्छेले भरिएको सार्वजानिक स्क्वायरमा थर्मोसबाट कफी खाँदै आरामले बसिरहेका छन् । उनीहरूलाई थाहा छ, यो बेला बाहिर निस्कनु ठीक होइन तर पनि अरूबाट दूरी बनाएर राख्दा र ‘कमन सेन्स’ लगाउँदा संक्रमणबाट बच्न सकिने उनीहरू बताउँछन् ।

एरिक्सन भन्छिन्, “हाम्रो सरकारले एकदम राम्रोसँग काम गरिरहेको छ । र यहाँका अधिकांश नागरिकहरू जिम्मेवार छन् । त्यसैले पनि हामीलाई कुनै चिन्ता छैन । ”

कोरोनाबाट संक्रमित हुनेको संख्या सोमबारसम्ममा १३ लाख पुगेको छ भने विश्वव्यापी रुपमा ७३ हजारभन्दा बढीको मृत्यु भइसकेको छ । तर यो विश्व संकटसँग लड्न स्वीडेनले चाहिँ बाँकी राष्ट्रहरू भन्दा अलगै बाटो अपनाइरहेको छ । छिमेकी देशमै सबै स्कुल, रेस्टुरेन्ट, सिमाना र पसलहरू बन्द भइसक्दा समेत स्वीडेनका नागरिकहरू काममा गइरहेका छन् भने प्राइमरी स्कुल, डे कियर, घुम्नलाई पार्क, जिम आदि सबै खुला छन् ।

अत्यावश्यक परिस्थितिबाहेक आन्तरिक उडान नगर्न भनिएको छ र जेष्ठ नागरिकलाई सकेसम्म घरमै बस्न प्रोत्साहन गरिएको छ । तर सबै अनिवार्य नियमका रूपमा भने कार्यान्वयन गरिएको छैन । स्वीडेनको सरकारले गत मार्च २९ मा मात्र सार्वजानिक रूपमा भेला हुनेको सङ्ख्या ५०० जनाबाट ५०जनाको समूहमा घटाएको हो र यो साता थप नीति नियम अपनाउनुपर्ने सम्बन्धी छलफल गरिनेछ । 

तर यसको अर्थ स्वीडेन कोरोनाबाट ‘इम्युन’ छ भन्ने चाहिँ होइन । आइतबार त्यहाँ मृत्युको सङ्ख्या ४०० पार गरेको छ । प्रधानमन्त्री स्टेफन लोभेनले शनिबार मात्र सञ्चारकर्मीसँग बोल्दै हजारौँको मृत्यु हुन सक्ने हुँदा तयारी अवस्थामा रहन भनेका हुन् किनकि स्टकहोमका एक तिहाइ वृद्धाश्रमहरूमा कोभिड–१९ को संक्रमण देखा परिसकेको छ । तर पनि शनिबार र आइतबार बिदाका दिन राजधानी स्टकहोमका सार्वजनिक स्थलमा प्यान्डेमिकको कतै कुनै संकेत देखिएन ।

३० वर्षीया लिन्डा एकेसन भन्छिन्, “ हो एक दुई साता सहर पूरै खाली भएको थियो तर मान्छेहरू भित्र बस्दाबस्दा वाक्क भए । यसकारण अहिले सबैजना सरकारको सुझाव अनुरुप आफैँ निर्णय लिई आफ्नै जोखिममा बाहिर निस्किरहेका छन् । यसमा सबैले सकेसम्म सार्वजानिक सवारी साधनको प्रयोग नगर्ने प्रयास गरिरहेका छन् र गरे भने पनि त्यसमा कुनै आपत्ति छैन ।” उनी आफैँ पनि कम्युटर ट्रेनमा चढेर साथीलाई भेट्न जान लागिरहेकी थिइन् ।

यसरी केही समय अगाडि गरिएका विभिन्न अध्ययन र सर्वेक्षणहरूमा समेत स्वीडेनका नागरिक कोरोनासम्बन्धी सबैभन्दा कम चिन्ता गर्ने देशवासीमा परेका हुन् । त्यहाँका सबैजना विश्व महामारीको क्षति कम गराउन स्कुल र सिमाना बन्द गराउनु भन्दा परीक्षण तिव्र गराइ, क्वारेन्टाइनमा जोड दिनुपर्नेमा विश्वास गर्छन् ।

अर्की एक ३५ वर्षीया आर्टिस्ट मिकेला क्लेभ भन्छिन्, “म अहिले जति सक्दो सामान्य जीवन बिताउने प्रयास गरिरहेकी छु । किनकि सबैकुरा एकैपटक बन्द भएर रोकिए पनि कङ्गाल हुने अवस्था आउन दिनु हुँदैन । हाम्रो स्वास्थ्य प्रणालीलाई पनि पैसा आवश्यक छ जुन हामीले तिर्ने करबाट प्राप्त हुन्छ ।”

यसबीच स्वीडेनवासीहरूमा एउटा भनाइ पनि लोकप्रिय बनेको छ, “जो बाँच्छ उसैले देख्नेछ ।”स्रोतः १२खरी